د. أحمد شادي

تعالى الأول نعرف إيه هما الـ SNRIs وإيه الفروق بينهم وبين الـ SSRIs.

إيه هما الـ SNRIs؟

في 4 أدوية بيتقال عليهم إنهم SNRIs:

• Venlafaxine.
• Desvenlafaxine.
• Duloxetine.
• Milnacipran.

بيشتغلوا إزاي وإيه الفرق بينهم وبين الـ SSRIs؟

• بيزودا الـ Serotonin و الـ Norepinephrine.
• بيزودوا الـ Dopamine في الـ Prefrontal cortex عن طريق زيادة الـ Norepinephrine. لكن الزيادة دي مش قوية. فبيتقال عليهم إنهم بيشتغلوا “بطريقتين ونص” أو two-and-a-half” mechanisms”.

إيه هي فايدة زيادة الـ Norepinephrine وإيه ممكن تكون آثاره الجانبية عمومًا؟

الفوايد:

• بيحسن الـ Anhedonia.
• بيحسن الهمدان أو الـ Fatigue.
• بيحسن التركيز أو الـ Concentration.
• بيقلل الألم.

الآثار الجانبية المُحتملة:

• بيزود الضغط حاجة بسيطة.
• ممكن يزود العرق.
• ممكن يعمل احتباس في البول (خاصةً مع الـ Duloxetine).

إيه هي الفروق بينهم في المُجمل؟

• مع إنهم كلهم بيزودوا الـ Serotonin و الـ Norepinephrine إلا إن في فروق بينهم في كمية الزيادة دي.

يعني في زيادة الـ Norepinephrine من الأضعف للأقوي بالترتيب (هنعرف أهمية دا واستخدامه كمان شوية):

• الـ Venlafaxine أضعفهم.
• الـ Desvenlafaxine أقوى شوية.
• الـ Duloxetine أقوى.
• الـ Milnacipran هو الأقوى في زيادة الـ Norepinephrine.

وفي زيادة الـ Serotonin من الأضعف للأقوى:

• الـ Milnacipran هو الأضعف.
• مفيش فرق في الزيادة في الـ Serotonin بين الباقيين، لكن كلهم أقوى من الـ Milnacipran.

دلوقتي والمرات الجاية هتكلم عن كل واحد منهم في:

• إيه المهم نعرفه عنه
• عيوبه
• استخداماته
• نكتبه إزاي.

الـ Venlafaxine:

إيه المهم نعرفه عنه:

• زيادته للـ Norepinephrine بتختلف حسب جُرعته: يعني في الجُرعات بداية من 75 ل 225 بيشتغل في الأساس على الـ Serotonin وفي بعض الناس بيشتغل على الـ Norepinephrine.
• بداية من 225 بيبدأ يشتغل على الـ Norepinephrine.

إيه هي عيوبه؟

• العيب الأساسي هو المشاكل اللي بتحصل للمريض لما نيجي نوقفه أو الـ Discontinuation Symptoms، خاصةً لو المريض مشي عليه فترة طويلة بجُرعات عالية (هنعرف نوقفه إزاي في الآخر).
• ممكن يزود الضغط، ودا مُرتبط بالجُرعة عشان زي ما عرفنا بيشتغل على الـ NE في الجُرعات العالية.

نستخدمه امتى؟

• مع المرضى اللي عندهم psychomotor retardation.
• مع المرضى اللي عندهم atypical depression.
• لو هنستخدمه مع حد عنده Fatigue أو أي ألم يبقى نبقى عارفين إننا هنحتاج نعلي الجُرعة عشان ناخد تأثيره على الاتنين دول.
• مع الـ Anxiety عامةً.
• من الحاجات اللي بتتاخد في الـ resistant depression كـ combination مع الـ mirtazapine والـ combination دا مشهور بـ “California rocket fuel”.

جُرعته إيه؟

• في الاكتئاب: من 75 لـ 225 مجم في اليوم.
• في القلق: من 150 لـ 225 مجم في اليوم، وفي ناس أحيانًا بتستجيب على 75.

نكتبه إزاي؟

• المكتوب في شتال إننا نبدأ بـ 37.5 XR مرة واحدة في اليوم لمدة أسبوع وبعدين نرفع الجرعة كل 4 أيام. ودا أنا مجربتوش قبل كدا الحقيقة.
• اللي جربته إنه ببدأ عادي 75 XR من الأول وتجاربي معاه لحد دلوقتي محصلش مشاكل، وبعرّف المريض إن لو حصل أعراض بتكون قلق ومشاكل في المعدة وهتقعد 3-5 أيام وهتختفي لوحدها. فقولنا تجاربك معاه برده، وهل حصل معاك مشاكل في بدايته ولا لا؟

نوقفه إزاي؟

• دي تجربتي مع التوقيف(لو عندك طريقة أفضل يا ريت تشاركنا): بقلل 37.5 كل أسبوع. يعني مثلًا لو مريض ماشي على 150 XR. بخليه يجيب 75 و 37.5 وياخدهم لمدة أسبوع، وبعدين ياخد ال 75 بس لمدة أسبوع، وبعدين الـ 37.5 لمدة أسبوع وبعدين يوقف.
• ساعات الطريقة دي مبتنفعش وبيحصل مشاكل مع التوقيف وأعراض انسحاب برده: بزود الـ Fluoxetine وبكمل على نفس الطريقة. وبوقف الـ Fluoxetine بعد توقيف الـ Venlafaxine بأسبوع.

لو ليك أي إضافة أو تعديل أو حابب تشاركنا بخبرتك يا ريت.

المصادر:

Stahl’s Essential psychopharmacology.

Stahl’s Essential psychopharmacology, Prescriber’s guide.